Press & News

Aruba Convention Bureau (ACB) ta anuncia cu hopi placer nan prome proyecto di Responsabilidad Social Corporativo, esta Corporate Social Responsibility (CSR), pa 2026, como parti di e campaña continuo di CSR di ACB. Pa medio di e iniciativa aki, Aruba Convention Bureau ta sigui anima organisacionnan y gruponan cu ta bishita Aruba pa participa activamente den proyectonan cu ta contribui na fortalecemento di nos comunidad local.

Recientemente, e grupo incentivo Indiana Constructors, cu 275 participante y cu tabata hospeda na Hyatt Regency Aruba Resort, a participa den un actividad di CSR practico na Centro di Bario Savaneta. E proyecto a enfoca riba trabounan di mantenemento y renobacion di e speeltuin, creando un ambiente mas sigur pa mucha y famianan di e bario.

Representantenan di ACB a bishita e grupo personalmente pa expresa nan agradecimento pa e apoyo brinda y pa reconoce nan compromiso cu duna bek na Aruba. E iniciativa aki ta un bon ehempel di con turismo por contribui no solamente economicamente, pero tambe socialmente, creando un impacto positivo pa e isla y su habitantenan.

E proyecto tabata posibel danki na cooperacion di Cede Aruba y De Palm DMC, e compania di maneho di destino di e grupo. Durante conversacionnan cu Richard Hedgecock, Presidente di Indiana Constructors, y tambe cu Laura Jackson, Senior Project Manager, y Andria Hine, ACB a wordo agradabelmente sorprendi pa e orguyo cu e boluntarionan a mustra pa nan donacion di mas cu USD 6,000 na material y pa dedica cuatro ora di nan biahe incentivo na servicio comunitario practico.

Ademas, durante un di e recepcionnan, e grupo a participa den un actividad di pintura en bibo, unda un artista local a crea un pintura inspira pa e turtugan di Aruba. Na final di e anochi, e pintura a wordo subasta, y e grupo a logra recauda USD 6,000 adicional, cu a wordo duna como donacion na Fundacion Centro Famia Piedra Plat.

Bastante di e participantenan tabata bishitando Aruba pa prome biaha. Sr. Hedgecock a resalta e hospitalidad caluroso di chauffeurnan di taxi, personal di hotel y e comunidad local, cu a haci nan bishita realmente memorabel. E deseo di e grupo pa duna bek y laga e isla bunita manera nan a hay’e ta alinia perfectamente cu e vision di A.T.A. pa turismo responsabel y cu impacto.

Pa ACB, e proyecto di CSR aki ta representa un exito inmediato y significativo. Un demostracion cla di con turismo por impulsa crecemento social, fortalece conexion comunitario y crea un impacto positivo y duradero mas aya di e experiencia di huesped.

Aruba Convention Bureau (ACB) ta opera como un division dedica dentro di Aruba Tourism Authority (A.T.A.). ACB ta enfoca riba atrae y reunionnan, incentivonan, conferencianan, y eventonan riba nos isla. ACB ta traha di cerca cu partnernan local y internacional pa posiciona Aruba como un destinacion prinicipal pa eventonan di negoshi mientras cu ta garantisa cu e actividadnan aki ta trece beneficionan significativo pa economia y comunidad local.