Press & News

Aruba Tourism Authority (A.T.A.) ta celebra cu orguyo e reconocemento internacional otorga na Jerusha Rasmijn, kende a ricibi e prestigioso Women in Leadership Award dia 20 di augustus 2026 durante Smart Woman Summit 2026 na Las Vegas, Nevada. Cu mas cu 36 aña di servicio den industria turistico di Aruba, Jerusha a construi un carera ehemplar basa riba compromiso, profesionalismo y liderazgo.

E Women in Leadership Award ta reconoce hende muhenan cu ta sobresali pa medio di liderazgo excepcional, vision y impacto den nan profesion. E reconocemento aki ta un testimonio di e impacto duradero cu Jerusha a crea den turismo di Aruba durante mas cu tres decada di servicio.

Jerusha actualmente ta Directora di Aruba Convention Bureau (ACB), un departamento bou di Aruba Tourism Authority. Durante su carera, el a hunga un papel fundamental den posiciona Aruba den e mercado internacional di Meetings, Incentives, Conferences and Exhibitions (MICE), construyendo relacionnan fuerte cu planificadornan di reunion, asociacionnan y partnernan strategico rond mundo. Como Directora di ACB, Jerusha ta guia e vision y direccion strategico di e departamento, impulsando iniciativanan cu ta fortalece e posicion di Aruba como un destinacion cu ta conoci pa reunionnan, congresonan y eventonan internacional.

“Jerusha ta un inspiracion y un ehempel di liderazgo autentico. Su dedicacion y pasion pa Aruba a contribui enormemente na posicionamento di nos isla como un destinacion di clase mundial,” a declara CEO di A.T.A. Ronella Croes.

A.T.A. ta sumamente orguyoso di e reconocemento mereci cu Jerusha a ricibi y ta felicita ‘Usha’ pa cu e logro aki. Jerusha su trabou, profesionalismo, perseverancia y compromiso durante mas cu 36 aña a laga marcanan importante den turismo di Aruba, algo cu e ta sigui haci. E reconocemento aki ta destaca e influencia positivo y e contribucion duradero cu Jerusha a haci den industria turistico local y mundial! PABIEN!