Press & News

Dia 20 di mei, Aruba Tourism Authority (A.T.A.), hunto cu Ecotech y den colaboracion cu Ministerio di Turismo, Transporte y Labor, conhuntamente cu Ministerio di Asuntonan General, Cultura, Medio Ambiente y Naturalesa, a firma oficialmente e acuerdo pa e prome Zona di Desperdicio na Barcadera. Cu e firmamento di e acuerdo aki, e partnernan a confirma nan compromiso pa crea un sistema mas organisa, accesibel y sostenibel, caminda residentenan por deposita desperdicio di un manera responsabel y contribui activamente na un Aruba mas limpi.

E iniciativa ta financia pa medio di A.T.A., asina continuando na sigura cu entrada genera door di turismo ta wordo inverti directamente den proyectonan cu ta beneficia tanto comunidad como medio ambiente y nos turismo.

Como parti di e campaña Aruba Limpi, A.T.A. no ta solamente crea conscientisacion pa mantene Aruba Limpi, pero ta enfoke tambe riba cambio di comportacion. E campaña aki lo core paralelo cu e introduccion di Zona di Desperdicio, creando conscientisacion, pero tambe dunando informacion na nos comunidad riba e uzo corecto di e facilidad, pero tambe riba e importancia di separacion corecto di desperdicio y formacion di habitonan responsabel den maneho di desperdicio.

Cu e introduccion di Zona di Desperdicio na Barcadera, residentenan lo tin acceso directo y practico pa deposita desperdicio di un manera responsabel. E iniciativa aki ta contribui na reduccion di dump ilegal y acumulacion di desperdicio, mientras cu ta fortalece sentido di responsabilidad comparti den comunidadnan. Pa A.T.A., un medio ambiente limpi no ta solamente crucial pa nos imagen como destinacion, pero e ta un inversion directo den sostenibilidad di nos producto turistico y bienestar di nos comunidad. Cu esaki, Aruba ta drenta un siguiente paso concreto pa sigura un futuro duradero pa nos isla.

Aruba ta wordo reconoci pa e hecho cu e ta limpi, y un isla limpi ta bisa hopi di su comunidad. A pesar di esaki, A.T.A. y tur partner involvi ta consciente cu mas accion ta necesario. Durante añanan, A.T.A. a sigui pone enfoke riba e topico di limpiesa, implementando y sosteniendo diferente iniciativanan. Rond di nos playanan, A.T.A. a pone bari di sushi cu diferente compartimentonan pa facilita e separacion di desperdicio, caminda Metabolic Foundation ta encarga cu e recogemento pa por recicla.

Ademas, A.T.A. ta activamente fortalece limpiesa di playa pa medio di colaboracion cu Varadero N.V., cu ta provee limpiesa mecanisa cu ekipo specialisa pa kita desperdicio manera glas, plastic y otro material cu por keda atras bou di e santo blanco y cu metodo tradicional no semper por kita eficientemente. E iniciativa aki ta complementa e limpiesa manual y ta contribui tanto na siguridad di bishitante y comunidad, como na proteccion di nos medio ambiente. Durante añanan, A.T.A. a conduci limpiesa den varios areanan di nos awanan tambe, por ehempel na Palm Beach a haci limpiesa pa reduci beach sludge/lodo, esaki den colaboracion cu autoridadnan concerni.

Otro esfuersonan enfoca riba limpiesa ta inclui iniciativanan manera “Baki den Bario,” cual a ricibi sosten di A.T.A. na november y december di 2025. Tur e accionnan aki ta refleha un compromiso duradero pa contribui na un medio ambiente limpi y un comunidad, pero tambe bishitantenan mas consciente.

A.T.A. ta invita tur residente pa haci uzo di e Zona di Desperdicio na Barcadera cuminsando dia 1 di juni 2026. Tur informacion relevante tocante uzo, orario di servicio y guia lo ta disponibel riba pagina oficial di social media di Aruba Limpi.