Press & News

Ministerio di Turismo, Aruba Ports Authority N.V. (APA) y Aruba Tourism Authority (A.T.A.) ta orguyoso di anuncia cu Aruba lo ta anfitrion oficial di e conferencia di crucero Platinum Associate Membership Advisory Council (PAMAC) 2025, un di e eventonan mas importante y reconoci pa e industria crucero na Norte America, Latino America y Caribe. E evento importante aki ta organisa pa Florida-Caribbean Cruise Association (FCCA) y pa e edicion aki ta patrosina a traves di un partnership entre APA y A.T.A.

Na aña 2017, exitosamente Aruba tabata anfitrion caba di e reunionnan di PAMAC y ta hopi contento di por yama bonbini atrobe na e prestigioso evento e siman aki. Tanto APA como A.T.A. tin lunanan caba ta preparando pa por brinda un experiencia sin igual na tur e ehecutivonan di e industria crucero cu lo bishita nos isla e siman aki. E ultimo PAMAC a tuma luga na Jamaica, pues ta un bon chens pa Aruba por “showcase” nos destinacion dilanti tur esnan cu ta tuma decision riba iterinario y rutanan cu e liñanan crucero ta opta p’e. E conferencia di PAMAC ta un plataforma popular cu ta inclui presencia di alto ehecutivonan di e industria di turismo crucero, tanto di liñanan crucero como di otro partnernan den e industria.

Un aspecto clave cu e PAMAC Cruise Summit 2025 lo trece pa Aruba ta e oportunidad pa showcase desaroyonan recien, actividadnan y excursionnan disponibel riba e isla como tambe e proyectonan di mehoracion mas importante cu ta andando y tin na caminda. Adicionalmente, e conferencia lo enfoca riba varios topico importante, incluyendo atrae cruceronan mas chikito y luhoso, sin lubida e intencion di por atrae crucero durante e temporada abou. Meta di e iniciativa aki ta pa engrandece e experiencia di Aruba y promove crecemento sostenibel den e industria crucero. Sostenibilidad ta keda un tema central den e industria di crucero y e conferencia aki lo pone enfasis riba su importancia door di alinea e strategianan di Aruba cu e industria mundial di crucero.

For di momento cu ehecutivonan di APA y A.T.A. a anuncia e intencion di Aruba pa ta “host” di e evento di e aña aki, mesora e entusiasmo a lanta entre e ehecutivonan participante. Na dado momento mester a limita participacion pasobra e demanda a surpasa tur expectativa, pasando riba 200 participante e aña aki. FCCA ta consider’e un record di atendencia. Tanto APA como A.T.A. ta convenci cu e demanda pa bishita Aruba, pa check e avansenan y con nos isla a desaroya den un di e destinacionnan di mas bunita, limpi y sigur den Caribe, ta loke a atribui na e interes aki.

Un PAMAC Cruise Summit tipicamente ta dura dos pa tres dia y ta inclui un variedad di actividad manera reunionnan, funcionnan y excursionnan. E prome dianan ta facilita interaccion entre ehecutivonan di crucero, partnernan local y representantenan di gobierno. Ta considera e interaccion aki como crucial, prome cu e ehecutivonan di crucero reuni cu e miembronan ‘platino’ mes. Mayoria di e participantenan lo bandona Aruba diabierna mientras otronan a scoge pa plak algun dia di vakantie su tras y asina ta pasa weekend na “e isla feliz”.

Ultimo añanan, Aruba a conoce varios construccion y renobacion cu a conduci na haci nos isla mas popular y competitivo como destinacion turistico di prome clase. Ambos entidad, tanto APA como ATA a inverti masha den mercadeo, den promocion y den estrecha laso cu e liñanan crucero pa atrae no solamente mas “calls”, sino specialmente den atrae cruceronan mas chikito pero cu miho calidad di pasahero. Esey ta obvio tambe den con a logra subi e cantidad di placa drasticamente cu casa pasahero ta laga atras na Aruba.

No solamente pa inversionnan haci den exterior sino tambe localmente, pa por a mantene y hasta crea areanan nobo unda e turista crucero por pasa su dia na Aruba. Via fondonan di ATA a percura pa henter un skema di mantencion di e areanan turistico mas uza pa nos turistanan. Den area di waf tamnbe a realisa hopi trabou, asina APA a crea baño y mas espacio pa sinta pa e pasaheronan y diferente otro mehoracionnan mas.

No por lubida di menciona cu e mesun APA y ATA a cera cabes den un inversion miyonario pa renoba y modernisa henter e edificio bieu di DOW situa dilanti porta di waf. Ey lo bira oficina di APA mientras cu abou lo bira un Visitors Center virtual maneha pa ATA. E pasaheronan lo topa cu un experiencia unico y por cera conoci mas di cerca cu nos isla como destinacion pa nan scoge riba nan siguiente vuelo di estadia na nos isla.

Aruba cu e siman aki ta anfitrion di e PAMAC Cruise Summit 2025 ta un testimonio di e compromiso di Aruba pa excelencia den e industria di turismo. Ministerio di Turismo, Aruba Tourism Authority (ATA) y Aruba Ports Authority N.V. (APA) ta anticipa cu entusiasmo e oportunidad pa showcase tur locual Aruba tin di ofrece, incluyendo ofertanan pa engrandece y fortalece relacionnan fuerte cu ehecutivonan di e liñanan crucero.

Florida-Caribbean Cruise Association (FCCA) ta un asociacion n cu ta consisti di 23 liña miembro cu ta opera casi 200 barco den laman di Florida, Caribe y Latino America. Funda na aña 1972, e meta di FCCA ta pa provee ​​un foro pa discucion riba operacionnan di crucero, desaroyo turistico, wafnan, operacionnan di tour, siguridad y otro asuntonan di e industria crucero. Door di fomenta mas comprendemento di e industria di crucero y su practicanan di operacion, FCCA ta busca pa construi relacionnan cooperativo cu su destinacionnan partner y pa desaroya partnershipnan bilateral productivo cu cada sector. FCCA ta traha cu gobiernonan, wafnan y tur representante di sector priva/publico pa maximisa gastonan di pasahero crucero, liña crucero y empleadonan di liña crucero, y tambe mehora e experiencia di destinacion y e cantidad di pasaheronan crucero cu ta regresa como bishitante stay-over despues.

AIDA Cruises, Carnival Cruise Lines, Celebrity Cruises, Costa Cruises, Cunard Line Ltd, Disney Cruise Line, Explora Journeys, Hapag-Lloyd Cruises, Holland America Line, Margaritaville aAt Sea, MSC Cruises, Norwegian Cruise Line, Oceania, Cruises, Cruises Princess Cruises, Regent Seven Seas Cruises, Silversea Cruises, Royal Caribbean International, Seabourn, SeaDream Yacht Club, TUI Cruises, Virgin Voyages y Windstar Cruises.