Press & News

Augustus 2024 ta marca un evolucion significativo pa evento iconico di ‘Aruba I Do’. Despues di un total di cinco edicion exitoso riba Eagle Beach, e evento awor ta wordo redefini como e renobacion matrimonial mas memorable den Caribe. E transicion nobo aki, alinea cu e High Value – Low Impact, ta percura pa priotisa e eco-sistema di e isla y ta para como un ehempel na responde na regulacionan nobo pa cu eventonan riba playanan na Aruba. E aña aki, e evento a bai for di Eagle Beach pa un lugar mas historico, esta Museo Historico Fort Zoutman. Un museo cu a ofrece un atmosfera mas intimo y memorabel na e setenticinco parehanan local e internacional cu a participa e aña aki.

E aña aki a celebra e di seis edicion di ‘Aruba I Do’, den un di e edificionan di mas bieuw y iconico di Aruba, situa den centro di Oranjestad. Den un ambiente romantico y yena di nostalgia, e parehanan a ricibi e oportunidad pa rebiba e momento di mas importante den nan bida matrimonial.

Un evento cu ta tuma lugar den Oranjestad conmemorando asina tambe e celebracion di dos shen aña di Oranjestad cu ta conmemora riba 24 di augustus. Mientras cu e parehanan a renoba nan compromiso matrimonial bou di e shelonan den Caribe, por a sinti e sentimento rico di Aruba su historia.

Ta di menciona cu desde e lansamento na 2019, ‘Aruba I Do’ bira un di e evento mas anticipa pa parehanan di tur parti di mundo, como tambe parehanan local. Na aña 2023, e evento a atrae un record di tres shen y cincuenta pareha, cu a logra posiciona e evento como e renobacion di matrimonio di mas grandi den Caribe.

Cu e cambio signicativo y nobo, por a conta cu un evento mas priva y memorabel caminda cu a provee e oportunidad pa setenta y cinco pareha for di diferente pais renoba nan matrimonio, esaki a inclui parehanan di; Estados Unidos, Canada, Argentina, Colombia, Chile, Italia, Reino Uni, y Aruba. Den e parehanan, por a conta cu algun pareha di e comunidad di LGBTQ+, cu ta refleha e diversidad y inclusion di e comunidad di ‘Aruba I Do’. Den e mesun grupo aki por a presencia cinco pareha influencers cu ta conta cu un total di 805K siguidornan combina riba plataformanan social internacional. Alabes, pronto lo por mira cobertura di ‘Aruba I Do’ riba diferente canalnan internacional, manera; Despegar Chile, Colombia, Argentia, Mexico, y Brasil, Decolar, The Travelization di Italia, creador di contenido di Estados Unidos, y mas. Un otro empuhe y exposicion riba plataformanan internacional pa asina por logra e meta di atrae bishitantean desea.

Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balanse entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.